جره قلم.. مقصوف يمكن توحد الصفوف

بقلم: علاء وحيد

• عقوبات مباراه الاهلي والمصري سياسيه والنيه هيه هيه.

• المخطط شغال والفتنه بتزيد ربنا يستر من بتاع الحديد.

• النيابه حولتها للجنايات والاتحاد طبخ القرارات والألتراس مشغول بالمظاهرات والأنديه غرقانه في المديونيات والتسخين شغال في الفضائيات وربنا يسترها علينا مما هو آت.

• نادي اجتماعي جديد.. تنفيذه من مجلس قلبه حديد.. واقفين في وش عنيد.. عاوز مصائب الاسماعيلي تزيد.. بعزيمه واصرار وحب فريد.. هيخطوا الصعب بعزم شديد.

• الدوري من غير المصري.. خيبه قويه وحصري.

• من يطالب بوقف النشاط ياريت يفتكر ناديه ويمنعه من ممارسه أي نشاط رياضي علشان الخراب يبقي علي الكل مش أخويا هايص وأنا لايص.

• السؤال الآن هلي الدوره التنشيطيه سوف تقام أم لا؟ السوال الأهم الدوري الموسم المقبل هيتلعب و لاء؟

• بطن الزير يعود في فليم جديد من تأليف واخراج سنكوح ومفضوح وجربوع هذا الفيلم متوفر بتقنيه (دخ) يعني داري خبيتك.

• زمان كانوا بيقولوا في الدول المتخلفه اصحي بدري تمسك نظام الحكم.. دلوقتي في مصر اصحي بدري ومعاك مجموعه تعملوا مظاهره وانت تيجي المالك والحاكم والفرعون وتمسك كل حاجه بس اصحي بدري.

• وزير البترول بيقول إن انتاج البنزين والسولار أكثر من 40% احتياجات.. طيب لو كان الانتاج زي الاستهلاك كنا رحنا فين؟ كل واحد عاوز بنزين يأخد جركن ويطلع علي غزه!!!

• لا يغير الله ما بقوم حتي يغيروا ما بأنفسهم ومشكلتنا الحقيقيه أننا ننتظر التغيير للأفضل وكل يوم بنحلم بالأفضل والأحسن بس نسينا حاجه بسيطه اننا لسه لم نغير أنفسنا والعوده الي الله هي الاخلاص الوحيد لنا.