محمد مظهر يكتب : ثلاث مقترحات لمجلس الإدارة

أولا :

السيد رئيس مجلس ادارة النادى الاسماعيلى
الساده اعضاء مجلس الادارة
برجاء عدم الموافقة على لعب مباريات النادى الاسماعيلى خارج استاد الاسماعيلية و رفض لعبها على استاد الجيش بالسويس و مطالبة السيد مدير امن الاسماعيلية بالموافقة على ان يكون هناك جماهير تحضر مباريات الفريق على ملعبه تقدر بثلاث الاف متفرج و اخطار الجهات المسئولة رئاسة الجمهورية و رئاسة الوزراء و وزارة الداخلية و وزارة الرياضة و اتحاد الكرة بان شعب الاسماعيلى سيحافظ على لاعبى الفريقين و طاقم التحكيم و سيظهر بمظهر مشرف و يعطى درسا لجماهير الاندية الاخرى فى الاحترام و التشجيع المثالى بالاضافة الى مساعدة شعب الاسماعيلية لافراد الشرطة فى تنظيم المباريات
بالاضافة الى لعبة كرة القدم فى العالم اجمع لا تلعب بدون جمهور و ان حلاوة الكرة فى الجماهير و ان من يعطى جمال و حلاوة للكرة هى المدرجات
السادة مسئولى الاسماعيلى لا توافقوا على قرارات خاطئة من زبانية القاهرة لا توافقوا على تعليمات و اوامر من هم اقل مننا بكثير
يا مجلس ابو السعود اعملوا الصح و الناس هتشجعكم عليه اعملوا الصح و الناس هتقف وراكم يا ابو السعود خلى الناس تشعر باننا قوة ضاربة و لنا كلمة.. آسف على الإطالة .

ثانيا :

اسئلة رفيعه :
1- هو الدورى مش هيتلعب بدون جمهور ؟ اه
2- طيب لما هو بدون جمهور ليه الاندية تلعب فى ملاعب القوات المسلحة و متلعبش فى ملاعبها ؟ عشان معملوش اشتراطات وزارة الداخلية
3- طيب ايه هى اشتراطات وزارة الداخلية ؟ ابواب حديد و كاميرات مراقبة
4- طب ما استاد بورسعيد كان فيه كاميرات و ابواب حديده هل منعت كارثة ماتش الاهلى و المصرى ؟ لا
5- طب امال الداخلية طلبت الشروط دى ليه ؟ غتاته
6- طب لما الدورى بدون جمهور ايه لزمة الاشتراطات دى ؟ يا عم غير الموضوع
7- طب انا اعرف ان لو الدورى بجمهور يبقى الحاجات دى ضرورية ؟ انت شكلك فاضى
8 – طب الاندية هتلعب على ملاعب القوات المسلحة ببلاش ؟ لا طبعا
9- ليه هياخدوا فلوس ؟ اه 50 الف بلبل فى الماتش الواحد
10- يعنى نادى شعبى مفلس يدفع كل ماتش 50 الف بلبل غير الاتوبيس و الفندق ؟ اذا كان عاجب ابوهم
11- طب ما يلعبوا على ملعبهم المباريات و هما بيلعبوا يعملوا الكاميرات و الابواب الحديد و نديهم مهلة مثلا تلات اربع شهور مدام مافيش جماهير ؟ لحظة واحده معايا تليفون
12 – يعنى الكاميرات هتراقب مين و الماتشات بدون جماهير ؟ هتراقب المهاجمين
13- يعنى الاهلى لما كان الدورى فى الايام العادية كان بيلعب 30 ماتش من 38 ماتش فى القاهرة دلوقتى هيلعب 34 فى القاهرة ؟ اه
14- طب ينفع الاسماعيلى يلعب فى ملعب الجيش الثانى الميدانى ( ملعب حكاية ) ؟ لا طبعا
15- ليه ؟ يعنى احنا عاملين الموضوع ده عشان نعكنن على الاسماعيلى و المحلة تقولى يلعبوا فى اسماعيلة ليه البلد سايبه
انا اسف على وقتك الثمين .

ثالثا :

ايه رايكم لو الاسماعيلى يعمل ماركة مسجلة باسمه و هذه الماركة لو على سبيل المثال تسمى ( I Ismaily ) تشمل هذه الماركة عدد من المنتجات على سبيل المثال ملابس رياضية و ادوات مدرسية اقلام و كراريس و كشاكيل عليها صور نجوم الفريق الحاليين و القدامى و شنط مدارس و كوفيات و حظاظات و ماجات ( كوبيات ) و سلسلة مفاتيح ( ميداليات ) و ولعات سجاير و طفايات سجاير و استيكر النادى و كابات ( طواقى ) و جربات موبايل و ساعات لليد و للحوائط و اعلام للمباريات و بوسترات و دميه ( تماثيل ) لنجوم الفريق
يعنى ممكن ناس تقول ايه يا عم تخاريف الصيام دى بس اقول لهم اى حد تسد فى الايام الجبس دى .