لن اتحدث عن خطا هشام عبد الحميد حكم مباراه الاسماعيلي مع المصري والذي تسبب في حرمان الاسماعيلي من ضربه جزاء صحيحه. كانت كفيله بحسم نقاط المباراه للأصفر. ولن اتحدث عن تحامله علي لاعبي الاسماعيلي وكانما هناك نار بايت بينه وبينهم. ولن اتحدث عن قراراته العكسية طوال المباراه ضد الاسماعيلي. ومش هافتح بقي خالص وأقول ان طاقم التحكيم كله كان متحاملا علي الاسماعيلي. وخصوصا بعد الشخطه الأولي بعد 5 ق من المباراه واكيد برده مش هاتكلم عن المباريات السابقه والتي ظلم فيها الاسماعيلي في ٦ ضربات جزاء كانت كفيله برفع رصيد الاسماعيلي الي 56 نقطه كفيله بالمنافسة الحقيقيه علي البطوله. ومش هافكر حضراتكم بان لو اتكلمت بهذه ألطريقه هتقولوا بيتحجج وبيرمي مشاكل الفريق علي الحكام. ومش هاقارن أبدا بين اداء الحكام في مباريات الفرق المشهور عنها الشخط والمدافعين عنهم في الاعلام والفرق قليله الحيله والتي ليس لها ظهر جامد في الاعلام. انا بس هاتكلم في حاجه واحده بس بعيدا عن اي فلسفات واحتجاجات. حكامنا المونديالين الكبار عملوا محترفين في الدول العربيه كرؤساء لجان تحكيم وكانوا متميزين وحيادين واخرجوا حكام مشرفين. صح. يحصل ايه لو ده تم تطبيقه في مصر وزي ما بنجيب مديرين فنيين لمنتخبنا وفرقنا اجانب مانجيب كمان لجنه تحكيم محترفه اجانب. ممكن نختار مدغشقر او تنجانيقا وزنزبار علي الأقل هيعرفوا يحاسبوا الحكم المخطئ واوعي حد يفهمني غلط. لان رد رئيس لجنه الحكام علي شكوي الاسماعيلي اكيد واتوقعه هيكون بالحرف. اخطاء التحكيم وارده وانا برده أوضح وبجد بقي زهقنا من اخطاء الحكام والاسماعيلي يريد حكام دوليين لمبارياته المقبله. وكفايه بقي تدريب الحكام فينا.والاسماعيلي يكاد يكون النادي الوحيد الذي يصرخ من الظلم ويقول بنثق في حكامنا وسنقولها دايما ونؤكدها احترامنا وتقديرنا لحكامنا وياريتهم يحترمونا زي مابنحترمهم ومش عاوز أقول العنوان الذي كنت عنونته للمقال. تحكيم بلوبيف ولجنه حكام من تناناريف ومعلش اخطاء الاعلاميين وارده. بالمختصر المفيد. علاء وحيد
