جرة قلم من علاء وحيد عن مباراة الاسماعيلى وإنبى

الف مبروك لكل الجماهير العاشقه لكرة القدم فوز الاسماعيلى اليوم إحياء للدورى العام .. واشتعال المنافسه ..بس والنبى من غير شماريخ.

-الالتراس كانوا على اسطح المنازل المجاورة للاستاد وتشجيعهم وصل للاعبين وكانوا رائعين واثبتوا انه لا غنى عنهم فى اى وقت و زمان و ربنا يكفيهم شر اللجان و اتحاد الكرة و الشماريخ.. و البطيخ.

-حسنى عبد ربه احتفل بعيد ميلاده بإحتفال من نار ولخبط كل اوراق مختار وترك انبى فى الجدول محتار.

-احمد سمير كان مجهودك وفير.

-حجازى لك كل حبى واعتزازى .

-معتصم سالم حجزت مكان فى الفريق دائم.

-احمد على بعد اسرع هدف فى الدورى اسمك الجديد احمد على الهلالى .. و برادلى بيسلم عليك.

-محمود جابر خليت مختار محتار .

-مختار مختار اعتراضك على الحكم غير مقبول او مفهوم ..ده إحنا افتكرنا انه جاء المباراة فى اتوبيس انبى .. يا راجل !!

-محاولات مستميته لتأجيل لقاء الاهلى والاسماعيلى بحجة المنتخب الاوليمبى ..والهدف واضح ومعروف وهو الالتفاف حول قرار لجنة المسابقات حتى يلعب الاهلى اللقاء بجماهيره.. يا أهل مصر المحروسه العدل يعنى العدل لو ضرورى تأجيل المباراة اذن العقوبة تؤجل هى الاخرى ولو غير كده هنقول ان الكوسه فى الدورى المصرى حصرى.

-الشباب والرياضه بالاسماعيليه شكرا لتعاونكم فى عدم تشغيل الشاشه الاليكترونيه..فعلا الشباب والرياضه بيحبوا الاسماعيلى جدا..ياترى نغير اسم الاسماعيلى الى اسم اسماعيلى الجزيرة عشان الشباب والرياضه يرضوا عن النادى.

-فى الدورة الرمضانيه اقصد فى الدورى المصرى فريق كل اسبوع (باى) يعنى لا يشارك .. وحظ الاسماعيلى انه (باى) فى العيد كل سنه وانتم طيبين ومؤمنين وطائعين والسنه الجاية تكونوا حاجين ولجمهوركم دائما مفرحين.